اتفقيات الجواز

عاوزه أسألكو عن حاجه مهمه أوى..والله مش هزار، دا جد الجد، وعاوزه أعرف رأيكو بصراحه وحياد من غير تهور واندفاع وبردو من غير تشدُد وتزمت، إعتبرونى بعمل دراسه عن الموضوع ده ومحتاجه أراءكم فعلاً.
الكلام للولاد وأكيد البنات لازم يشاركو...إتفقنا؟



إفرض إنك حد كويس أوى ،أخلاقك ممتازه ومتدين وفجأه كدا ومن غير مقدمات جتلك واحده (تعرفها أو متعرفهاش) بردو محترمه وأخلاقها كويسه ومتدينه، وقالتلك فى وشك"أنا بَحِبَكْ"... هتعمل إيه وهيكون رد فعلك إزاى؟ والأهم نظرتك للبنت دى هيكون شكلها إيه؟ هتتصدم ولا هتاخد الموضوع ببساطه؟ يا ترى ممكن تفكر وتقلب الموضوع فى عقلك ولا هتحسمه بسطحيه وتقول فى نفسك دى بنت مش مؤدبه (حتى لو هى عكس كدا خالص) وتلغى التفكير فيها نهائياً؟؟
ولو حصل وإتجاوبت معاها على سبيل التجربه يعنى..يا ترى بعد كدا مش هتخاف منها ومن جرأتها إللى ممكن الناس تسميها "وقاحه"؟؟





إنتِ بآ يا آنسه يا مؤدبه يا جميله ومحترمه كمان،،، لو فى يوم كدا فتحتى شبابيك عقلك وقلبك علشان المكان يتهوا، وغصب عنك دخلك تيار متعرفيش منين شايل صورة وصفات واسم حد معين ولقيتيه ممتااااز جداً ولايق ليكى أوى، بس ولا واخد باله منك ولا حاسس بيكى أصلاً ، هتتصرفى إزااااى؟
طَب نقول بآ إنه مش مجرد شخص مناسب وإعجاب بس..وإنك صحيتى مره من النوم لقيتى نفسك مشغوله بيه، روحتى تغسلى وشك لقيتى عنين تانيه بتبحلأ فيكى وملامح غير إللى تعرفيها ولما سألتى نفسك: هو فى إيه؟ ردت عليكى نفسك بمنتهى الإستسلام : إنتِ بتحبيه....أيوان " بتحبيه".
رديتى بقِلة حيله: طب وهنعمل إيه يعنى..إللى حصل بآ
لكن نفسك الأمَّاره بالـ..... قالتلك: إتصرفى، لمحيله، كلميه، إبعتى له حد، أو حتى قولى لباباكى أو أخوكى يفاتحوه، بُصى.. لو غلبتى خالص ومفيش حاجه نفعت...روحيله وكلميه بنفسك، قوليله إنك بتحبيه وإرمى الكوره فى ملعبه وزى ما تيجى.





يالهوى..مستحيل طبعاً...بنت مين دى إللى تتجرأ وتكلم باباها ولا أخوها فى حاجه زى دى؟؟! دول كانوا يكسروا رقبتها ؛إنت صدقتى العبيطه إللى راحت قالت "بحبه يا بابا...عااااااااااااا" دا باباها كان بيجرجرها فى الكلام وزمانه طحنها وتلاقيها فى قسم الحالات الحرجه لحد دلوأت،وحكاية إنى أوسَّط حد بينا متنفعش..إفرض "كبسنى" تبآ فضيحه بآ وإللى ما عرفش يعرف؟ وأنا كمان أخاف أكلِمُه يخاف منى ووشه يحمر ويصفر ويغرق فى عرقه من الإرتباك،ومش بعيد تيجيله ألّبَه سكتيه ولا سكته ألّبيّه من الصدمه، ولو هو حد شرير وبيمثل الطيبه تبآ كارثه وممكن يسئ إستغلال الحب ده.
- وبعدين؟؟ هنفضل ساكتين كدا؟!! قليلات الحيله؟
- أهو أحسن ما نبآ "قليلات الأدب".

أعرف كذا حد بنت حصل لها كدا، شايفه نفسها مناسبه جداً لشخصٍ ما وهو كمان مناسب ليها وهيكونو سعدا مع بعض، بس بيكون فى بينهم "ستاير" بتحجب الرؤيه الواضحه،وممكن حتى هو يكون مش شايفها أو مش فاهمها أو حتى خايف يقرب منها، وبكدا يضيَّع على نفسه وعليها حاجه حلوه ممكن ما تتكرر تانى بقية العُمر.
فاكرين موقف أُمنا السيده "خديجه" رضى الله عنها وأرضاها مع سيدنا محمد عليه الصلاةُ والسلام لما بعتت له واحده مقربه ليها علشان تجس نبضه وتكلمه عن الجواز؟ أعتقد إن كل حاجه حصلت فى حياة سيدنا محمد "ص" ما كانت من غير سبب، كلها قدوه.
بس البنات مش زى السيده خديجه فى ذكاءها وفطنتها، ولا الرجاله فى أخلاق وأدب سيدنا محمد"ص" ،ولو حصل الموقف دا مع حد ممكن "يسَيَّح للبنت" ويعملها فضيحه؛ الواد يفكر نفسه "دون جوان" والبنات بترمى نفسها عليه ولازم يتباهى أؤودام صحابه ويتحول ل"دون" من غير جوان، وكمان معدش فى ثقه ولا حد يقدر يدى أسراره لأى حد، زى ما بيقولوا "صدرك أوسع لسِرَك" والمثل إللى قلته لكم قبل كدا :" خليها فى القلب تجرح بدل ما تخرج منه وتفضح" دا صح جداً



البنات بجد صعبانيين علىّ؛ أعرف واحده ممكن يغمى عليها لو سمعت اسم حد معين من كتر حبها ليه، لدرجة انى فكرت أكلمه والله العظيم شفقةً لحالها،يمكن يحس بيها شوى، المصيبه بآ إنى عرفت من كام يوم إنه "خطَب" وفرحه فى الصيف، دى ممكن تموت فيها لو عرفت.
"نجاة" عندها أغنيه بالمعنى دا بردو وكل ما كنت اسمعها كنت اتفرس من الغيظ وقِلة الحيله وقلبى يوجعنى علشانها، كلماتها فظيعه وتوجع أوى. ممكن أفكركو بيها؟، اسمها "ساكن قصادى" بتقول إيه:
"ساكن قصادى وبحبه..بحبه..وأتمنى أقابله ،فكرت أصارحه، لكن أبداً ، أبداً ما أقدرش أقوله وفضلت أستنى أستنى الأيام فى ميعاد ما يسهر وميعاد ما يرجع وف كل خطوه أرسم أحلام تكبر فى قلبى والقلب يطمع، وأقول مسيره هيحس بىَّ لو يوم صادفنى وسلم علىَّ؛ هيلاقى صورته ساكنه فى عينى ويحس بيها ف رعشة إيديا، كنت حاسه إن حبُه كل مادا كان بيكبر وأبآ عايزه لو يكونلى قلب غير قلبى الصُغيَر.فضلت أمانى مع الليالى تقرب حبيبى إللى ساكن قصادى وبحبه.
وف يوم صحيت على صوت فرح بصيت من الشباك، زينه وتهانى وناس كتيير دايريين هنا وهناك، شاورولى بإيديهم وقالولى عؤبالك، هللت م الفرحه وسألت...قالوا جارك، جارى حبيبى إللى ساكن قصادى و...بحبه
روحت الفرح بالليل ورسمت فى عينى الفرحه ،ساعة ما كان بيشيل بإيديه وبعينيه الطرحه، شربت شرباتهم وأنا قاعده باصلهم ، لحد ما قاموا ومشيت أوصلهم، حتى الأمل ما بآش من حقى أفكر فيه، بعد الليله دى خلاص، بآ غيرى أولى بيه، وتهت وسط الزحام ما حد حاسس بى. عايزه أجرى أجرى وأرجع أتوه والناس يؤولوا حاسبى؛ ناس فى طريق النور ما بين فرح وشموع، وأنا فى طريق مهجور ومنواراه بالدموع، ولقيتنى فايته من جنب بابه.. لا هو دارى بقلبى ولا بإللى نابُه، ويا ويلى يا ويلى من طول غيابه ويا ويل أيامى من جرح عذابه.. ساكن فى قلبى وساكن قصادى و....بحبه



بس جرب يفكر فيها وف حال المسكينه دى؟؟ الموسيقى أساساً عامله شغل جامد جداً مع الكلام
أرجع للسؤال تانى...لو حد من الولاد حصل معاه كدا هيتصرف إزاى ويفكر فى البنت دى على إنها إيه؟ والبنوتات الجميلات بآ لو واحده حظها وقعها فى بنى آدم القطب الشمالى اسخن منه ، هتؤوله ولا هتسكت وتنسى ولا هتفضل تعانى لحالها زى الأخت نجاة؟؟!
عارفين..فى ناس فعلاً لازم تمسكهم وتفتح عيونهم بالعافيه علشان يشوفوا كويس.وآل إيه..الولاد بيؤولو على نفسهم مفتحين ويفهموها وهى طايره...دعايه كاذبه عن الرجاله.دا فى حد ممكن تضطر تخبطه بطاسه على نفوخه علشان يحس ويفهم



شوفتوا عبعال وسوكيننه فى مسرحية ريا وسكينه؟؟ تقوله أول حرف من اسمه "ع" وبيشتغل أومباشى فى الكراكون ويقولها "عحمد" جبتهاله على بلاطه وقالتله اسمه "عبعااااااااااال" قالها إللى بتحبيه وعاوزه تتجوزيه اسمه على اسمى؟؟ يا دهوتيىىىىىىىىىىىىى ،حاجه تجيب الشلل

يا كل رواد صفحة "المخطوبين أهُم" وكل صفحات الفيس بوك...لو أقدر اسأل أكبر عدد من الولاد لو بنت عملت معاك كدا هتتصرف إزاى؟؟ ممكن تقدر تصرفها وتتفهم حبها لك وتخطبها؟ وبردو لو اقدر اعرف رأى كل البنات لو ممكن تتصرف بالشكل ده؟؟ وإيه إللى يجرأها أو يمنعها؟؟
حاولوا تساعدونى اعرف إحنا بنفكر إزاى؟؟



ياريت الموضوع يعجبكم
بس برضة ياريت اسمع ارئكم

كل انسان بياخد اللى ربنا سبحانه وتعالى قسمه له واصلا الزوج مكتوب عند الله ومفيش حد بياخد غير نصيبه لذلك يجب ان تتمسكى باخلاق الفتاه المسلمه